Në Kosovë nuk ka drejtësi!

Sot (2 shkurt 2010) në kohën kur nga institucionet e Kosovës po kremtohej “sundimi i ligjit” në Kosovë, në Sallën Kuqe të Pallatit të Rinisë aktivistët e Lëvizjes VETËVENDOSJE! ndërmorrën një aksion simbolik për të treguar se në Kosovë nuk ka fare drejtësi. Aktivistët e Lëvizjes mbajtën parulla në të cilat ishin të shkruara fjalitë e mëposhtme si dhe hodhën masivisht fletushka në të cilat shkruhej “NË KOSOVË NUK KA DREJTËSI!”.

Ndërkohë, organizatorët e manifestimit si dhe anëtarët e sigurimit intervenuan dhunshëm dhe i nxorën një pjesë të aktivistëve tanë nga salla. Aktivistët e tjerë, në shenjë protestuese reaguan duke fishkëlluar me pipa dhe më pas u larguan dhunshëm nga Policia e Kosovës.

Ky intervenim ishte edhe një shembull më tepër se si “drejtësia” në Kosovë i ka dy fytyra. Ajo është policore në raport me qytetarët e Kosovës kurse, toleruese në raport me shkelësit e vërtetë të ligjit: strukturat paralele të Serbisë, politikanët e korruptuar, etj.

Organizimi i një manifestimi të tillë për kremtimin e të ashtuquajturit sundim të ligjit është pjesë e projektit të këtij sistemi politik që për qëllim ka krijimin e iluzionit tek qytetarët e Kosovës se në vendin tonë çdo gjë është në rregull, kurse krejt çfarë na ka mbetur është të kremtojmë. Ky iluzion është i papranueshëm kur jemi dëshmitarë se çdo ditë, qytetarit të këtij vendi i shkelen edhe të drejtat më themelore.